Sérmeðhöndlun vegna dóms Hæstaréttar

Ekki skil ég hvers vegna SP, AVANT og Lýsing þurfa að fá sér meðhöndlun frá stjórnvöldum í afgreiðslu vaxta á gengistryggðu bílasamningana, sem dæmdir voru ólöglegir í Hæstarétti um daginn, en nú skal reikna svo kallaða seðlabankavexti. Það eru vextir sem ég hef aldrei samþykkt, en þeir eiga að koma í stað libor vaxtana sem á samningnum eru, stjórnvöld halda því hinsvegar fram að þetta sé eina sanngjarna leiðin. Þetta er ekkert annað en þjófnaður í skjóli sofandi fjármála stofnana sem stjórnvöld bera jú ábyrgð á. Á þessu tímabili, sem að mér snýr hafa þeir haft þessar ólöglegu gengistryggðu afborganir, vexti og verðbætur, þessir peningar lágu ekki bara inná bankabókum. Þeir fá sem sagt bæði þessa liborvexti og svo núna í viðbót þá vexti sem viðskiptaráðherra telur einu sanngjörnu leiðina, seðlabanka vextina. Það á sem sagt að verðlauna skúrkana í stað þess að dæma þá, dæmigerð íslenskt aðför

Umboðsmaður Alþingis skrifar RSK bréf vegna SP fjármögnunar

Ég hef átt í samskiptum við Ríkisskattstjóra (RSK) vegna bókhaldsbrota SP fjármögnunar og hugsanlegra skattsvika en án árangurs í bráðum eitt ár. Þetta bréf sendi ég RSK um daginn og snéri mér að lokum til Umboðsmanns Alþingis sem var fljótur að bregðast við en virðist hafa fengið eitthvað þunnt svar frá RSK og svarar honum því aftur með lengra bréfi.  Bréfið má lesa hér.

Ath. Umboðsmaður misritar „ríkislögreglustjóri" á einum stað á síðustu síðu, augljós ritvilla, á að vera „ríkisskattstjóri."

Bréf sent á Ríkisskattstjóra vegna seinagangs

Sæll Bjarni

Hvert er erindi bréfsins sem RSK er með í smíðum til eignaleigufyrirtækjanna?  RSK hlýtur að geta svarað því hvort ég hafi átti að greiða vsk. af bílnum eða ekki. Vsk er tilgreindur á samningi mínum og eins kemur fram á heimasíðum fyrirtækjanna að vsk. sé greiddur í upphafi af leigutaka/kaupanda af kaupleigubílum, hvers vegna er þá ekki vsk. á reikningnum sem ég fékk frá þeim? Þetta virðist ekkert vera bundið við það hvort bíllin er keyptur notaður eða nýr?
Sjá hér hjá Íslandsbanka sem er með sama fyrirkomulag

http://www.islandsbanki.is/fjarmognun/atvinnutaeki/

Og hjá SP segir „Viðskiptavinur greiðir seljanda vsk. ef hann fæst endurgreiddur sem innskattur.  Samningsfjárhæð með/án vsk. Leigugreiðslur án vsk."

http://www.sp.is/categoryplain.aspx?catID=47

Þetta passar ekki því að nokkrir hafa fengið reikning (sem keyptu nýjan bíl) sem er með vsk og hafa því greitt vsk.-inn ekki satt? Þú hefur fengið sent dæmi um þess konar reikning ef ég man rétt.

Þetta passar heldur ekki við aðrar upplýsingar á síðu SP. „SP-Fjármögnun greiðir kaupverðið án virðisaukaskatts. Leigan reiknast af kaupverði án virðisaukaskatts en leigutaki greiðir allan virðisaukaskattinn til seljanda strax í upphafi. Leigutakinn fær virðisaukaskattinn endurgreiddan sé hann með virðisaukaskattskyldan rekstur. Því leggst enginn virðisaukaskattur ofan á leigugreiðslu"

http://www.sp.is/category.aspx?catID=17

Sem sagt, greiddi ég vsk. af bílnum eða ekki, átti ég að greiða vsk. af bílnum eða ekki?

Bréfið til Umboðsmanns Alþingis er í smíðum og fer áfram því að þetta svar þitt gefur til kynna að ekkert hefur verið kannað með málið. Held það séu 9 mánuðir síðan ég sendi ykkur erindið.

Kveðja
Geir Birgir

 Bréf Bjarna hér fyrir neðan

Sælir!

Ég veit að það er ekki til fyrirmyndar að hafa ekki svarað erindi þínu. Því miður á það við um svo mörg erindi sem borist hafa okkur síðustu misseri, hvort sem um er að ræða til að mynda fyrirspurnir eða almenn skatterindi, að starfsmenn ríkisskattstjóra geta oft á tíðum e.t.v. ekki sinnt þeim með eins mikilli nákvæmni og fljótt og áður. Ég hef áður nefnt það við þig að fleiri flókin verkefni eru á færri höndum en áður. Þá er embættið að ganga í gegnum miklar skipulagsbreytingar og hefur sú fæðing tekið mikið á, eins og nærri má geta.

Hvað þitt mál persónulega varðar þá hef ég ætið viljað fá niðurstöðu í það mál, eins og annarra í sömu stöðu og þú. Það sem ég hafði hugsað mér er að afla gagna og upplýsinga frá þessum eignaleigufyrirtækjum. Bréf ríkisskattstjóra hefur tekið lengri tíma í smíðum en ég hafði ætlað mér en ástæður þess ætla ég mér ekki að rekja hér og nú. En það fer út.

Kveðja / Regards
Bjarni Amby Lárusson